నిజం కదా!

పట్నం వాళ్ళది
నాగరికత!
పల్లెటూరి వాళ్లది
‘నాగలి’కత

----భాస్కరభట్ల

ప్చ్!

ఇప్పుడసలు
గుండెలు చెమ్మగిల్లడమే లేదు!
వర్షం వచ్చినప్పుడు
గోడలు తప్ప!

---- భాస్కరభట్ల

ఇష్టారాజ్యం!

చిన్నప్పుడోసారి..
మానాన్న కళ్ళద్దాలు పగలగొట్టేశా..
చెంపఛెళ్ళుమనిపించాడు.!

ఇప్పుడేనయం..
ఎంచగ్గా బస్సుఅద్దాలు పగలగొట్టినా
అడిగేవాడే లేడు!

----భాస్కరభట్ల

గుర్తుకొస్తున్నాయి

తప్పిపోయిందనుకున్న బాల్యాన్ని
మా అమ్మ పాత ట్రంకుపెట్టె అడుగున
నా చిన్నప్పటి ఫోటోలో
మళ్ళీ చూసుకుంటున్నాను!!!


----భాస్కరభట్ల

అమ్మ!

ఇంటిల్లిపాదికీ
చాకిరీచేసి అలసిపోతున్న
మా అమ్మని చూసి
నుదుటిమీది కుంకుమబొట్టు
బొట్లు బొట్లుగా ఏడుస్తోంది!

----భాస్కరభట్ల

ఛ!!!

మనం ఎప్పుడూ
ఎదురీదాలనుకోం..
ఏటికి ఎదురీదిన ఇలసని కూడా
పులస అంటూ
పులుసు పెట్టేసుకుంటాం!

---భాస్కరభట్ల