ఎంతఘోరం!

విక్రమార్కుడి భుజాలమీద
భేతాళుడిలా...
బడిపిల్లాడి
భుజాలమీద
భారంగా వేలాడుతున్న
పుస్తకాల సంచీ!!

-----భాస్కరభట్ల

హు(

ఆమె ఉత్తర దిక్కు..
నేను దక్షిణదిక్కు..
అందుకేనేమో
ఎన్ని ఉత్తరాలు రాసినా
స్పందించట్లేదు!!

----భాస్కరభట్ల

చదువుకునే రోజుల్లో...

అందమైన అమ్మాయి కనిపించగానే
చూపులన్నీ
పాదాలమీదే!.
హమ్మయ్య..
మెట్టెల్లేవ్..
ఆమె నాదే!

-----భాస్కరభట్ల

మంచి‘ఐడియా’!

సెల్ ఫోన్‌లో టాక్‌‍టైం
అయిపోగానే
రీఛార్జ్ చేయించుకునే అవకాశం ఉన్నట్టే..

జీవితంలో అప్పుడప్పుడూ దూరమైపోయే
కొంచెం ఆనందాన్నీ,
ఇంకొంచెం మనశ్శాంతినీ
రీఛార్జ్‌చేసుకునే సౌకర్యం
ఉంటే ఎంత బాగుణ్ణో!!!

------భాస్కరభట్ల

మీకూ అంతేనా?

ఇప్పుడంటే రెండేగానీ...
చిన్నప్పుడు నాకు మూడు కళ్లు!
పుస్తకంలో
దాచుకున్న
నెమలికన్నుతో కలిపి!!!

----భాస్కరభట్ల